為咗幫細佬黎嬰打理美容診所生意，黎姿聲言暫停拍劇，雖然暫別幕前，但元宵佳節（二月廿一日）當日，佢依然俾面出席一個皮具品牌酒會。
戴住英國品牌Stephen Webster鑽錶加鑽戒現身嘅黎姿，何只行頭十足，腳下嗰對四吋高踭鞋，更加令佢高人一等，但相比起著住平底鞋、响現場負責攞住新款手袋行catwalk嘅Ana.R，黎姿只不過僅僅同對方一樣高。
一身珠光寶氣，心情靚爆嘅黎姿自爆同圈外男友「G先生」發展順利，希望過多兩年，可以學好姊妹蔡加敏，出嫁兼生仔。至於「G先生」是否黎姿嘅Mr.Right，佢就怕怕醜醜話：「唔好再問啦！」
八珍希望，兩年後黎姿如願嫁得出，細佬黎嬰又可以完全康復，雙喜臨門，唔好噓，新正頭，八珍梗要好口啲。
好在黎姿有對四吋高踭鞋頂住，否則拍埋Ana.R同男model身邊影合照，搞到變咗個「凹」字就尷尬。
正所謂有心唔怕遲，十五都係拜年時，有份現身酒會嘅葉童，新十五攞住成疊利是派俾記者同工作人員，非常識做。
戒指加鑽錶幾乎40萬，黎姿一身富貴行頭，自爆同圈外男友「G先生」蜜運中，今個情人節仲收到禮物同花，希望過多兩年就嫁，恨到出晒聲。
$97,400 Stephen Webster 18K 白金紫晶2.07卡 石榴石Buffer戒指
